X
Azərbaycanın tutduğu yol müstəqil Azərbaycan Respublikası, demokratik hüquqi cəmiyyət qurmaq yoludur! Heydər Əliyev
Ölkəmizin hərtərəfli inkişafı üçün, demokratik, hüquqi dövlətin əsaslarının möhkəmlənməsi üçün məhkəmə-hüquq sisteminin təkmilləşməsi başlıca şərtdir İlham Əliyev

Elektron xidmətlərə dair qısa məlumat


- Qeydiyyat orqanları və vətəndaşlıq vəziyyəti aktlarının qeydiyyatının aparılması barədə məlumatın əldə edilməsi

"Qeydiyyat orqanları və vətəndaşlıq vəziyyəti aktlarının qeydiyyatının aparılması barədə məlumat verilməsi" üzrə elektron xidmətdən istifadə etməklə şəxsin bütün qeydiyyat orqanları, onların tam siyahısı, ünvanı və rəhbərlərinin adları, xəritədə yerləşmə mövqeyi, əlaqə məlumatları və iş rejimi, eyni zamanda qeydiyyata alınmasını istədiyi əməliyyatın aparılması üçün tələb olunan sənədlərin siyahısı, qeydiyyat prosesinin iştirakçıları və bunun üçün nəzərdə tutulan müvafiq ödənişlər barədə məlumat əldə etməsi mümkündür.

- Azərbaycan adları barədə məlumatın əldə edilməsi

Bu xidmət şəxsi maraqlandıran adlar barədə məlumat almaq imkanı verir. Burada adın mənşəyi, onun izahlı şərhi, eləcə də həmin ada dair statistik göstəricilər yerləşdirilmişdir. Həmçinin bu xidmətdə yeni doğulmuş uşaqlara illər üzrə ən çox verilən adlar barədə məlumat əldə etmək mümkündür.

- Vətəndaşlıq vəziyyəti aktlarının dövlət qeydiyyatı üçün müraciətin və sənədlərin qəbulu

Bu xidmətdən istifadə etməklə şəxs qeydiyyat orqanına getmədən vətəndaşlıq vəziyyəti aktlarının qeydiyyatı üçün skan edilmiş sənədlərin surəti əlavə olunmaqla elektron müraciət formasını doldurur. Bundan sonra ərizə və müvafiq sənədlər qeydiyyat orqanı tərəfindən qəbul edilərək çap olunur, məlumat və sənədlərin düzgünlüyü, eləcə də qanunvericiliyin tələblərinə uyğunluğu yoxlanılır və bunun nəticəsindən asılı olaraq doğumun, soyadın, adın və ata adının dəyişdirilməsinin, övladlığa götürmənin, atalığın müəyyən edilməsinin və ölümün qeydiyyatı aparılır və bu barədə şəhadətnamənin təqdim edilməsi üçün vətəndaş qeydiyyat orqanına dəvət olunur.

Nikahın bağlanması və nikahın pozulmasının dövlət qeydiyyatı və bu barədə müvafiq şəhadətnamənin verilməsi isə yalnız vətəndaşın iştirakı ilə həyata keçirilir.

- Qeydiyyata alınmış vətəndaşlıq vəziyyəti aktları ilə bağlı sənədlərin verilməsi

Bu xidmət vasitəsilə istifadəçi Azərbaycan Respublikası Ədliyyə Nazirliyinin və Naxçıvan Muxtar Respublikasının ərazisində Naxçıvan Muxtar Respublikası Ədliyyə Nazirliyinin rayon (şəhər) qeydiyyat orqanlarına, Vətəndaşlıq vəziyyəti aktlarının reyestri xidmətinə getmədən dövlət qeydiyyatına alınmış vətəndaşlıq vəziyyəti aktları ilə bağlı sənədləri əldə etmək üçün elektron müraciət formasını doldurur. Elektron müraciət forması və müvafiq sənədlər qeydiyyat orqanı tərəfindən qəbul edilərək çap olunur, məlumat və sənədlərin düzgünlüyü, eləcə də qanunvericiliyin tələblərinə uyğunluğu yoxlanılır. Nəticədən asılı olaraq vətəndaşlıq vəziyyəti aktlarının qeydiyyatı haqqında təkrar şəhadətnamə və ya arayış hazırlanır və təqdim edilməsi üçün istifadəçi qeydiyyat orqanına və ya Xidmətə dəvət olunur. İstifadəçi müvafiq arayışı elektron formada əldə etmək istədikdə isə elektron imza ilə təsdiq olunmuş arayış onun elektron poçt ünvanına göndərilir.

- Dövlət notariat arxivindən notariat hərəkətləri barədə məlumatın və onlarla bağlı sənədlərin surətlərinin verilməsi

Bu xidmət Dövlət notariat arxivindən notariat hərəkətləri ilə bağlı məlumatın və onlarla bağlı sənədlərin surətlərinin verilməsi üçün müraciətin və sənədlərin elektron formada qəbulu üçün nəzərdə tutulmuşdur. Şəxs arxivdə saxlanılan notariat sənədləri barədə məlumatın, eləcə də onlardan dublikatın və surətlərin verilməsi üçün müəyyən edilmiş ərizə formasını dolduraraq Dövlət notariat arxivinə elektron formada göndərir. Arxivin əməkdaşları tərəfindən müraciət qəbul edildikdən sonra 1 iş günü müddətində sənədlər hazırlanaraq şəxsə təqdim edilir.

- Notariat kontorları və notariat hərəkətlərinin aparılması barədə məlumatın əldə edilməsi

Bu elektron xidmətdə respublika ərazisində fəaliyyət göstərən dövlət notariat kontorları və xüsusi notariuslar, onların ünvanları, telefon nömrələri, iş rejimi, xəritədə yerləşmə mövqeyi barədə məlumat yerləşdirilmişdir. Hər hansı notariat hərəkətinin rəsmiləşdirilməsi üçün notariat kontoruna müraciət etməzdən əvvəl şəxs bu xidmət vasitəsilə təqdim ediləcək sənədlər, onları verən orqanlar, notariat hərəkətinin iştirakçıları, eləcə də ödəniləcək vəsait barədə əvvəlcədən məlumat almaq imkanı əldə edir.

- Vərəsəlik işlərinin açılıb-açılmaması barədə məlumatın verilməsi

Bu xidmətin köməyi ilə ölən şəxs barədə vərəsəlik işinin açılıb-açılmaması, açıldığı təqdirdə mirasın qəbulu barədə ərizənin hansı notariat kontorunda qeydiyyata alınması barədə məlumat əldə etmək mümkündür. Bunun üçün istifadəçi elektron xidmətə daxil olaraq axtarış formasının müvafiq bəndlərinə ölən şəxsin ad, soyad, ata adı və ölüm tarixi barədə məlumatları daxil edərək axtarışı həyata keçirməlidir. Axtarışın nəticəsi barədə məlumat dərhal ekranda əks olunur.

- Ədliyyə orqanları və notariusların qəbuluna onlayn yazılış

Ədliyyə orqanlarının, eləcə də notariusların qəbuluna yazılmaq istəyən şəxslər müvafiq elektron xidmətə daxil olaraq özləri barədə şəxsi və əlaqə məlumatlarını daxil etməklə qəbuluna düşmək istədikləri rəhbər işçilərin müəyyən olunmuş qəbul saatlarını seçdikdən sonra qəbula yazılmaq imkanı əldə edirlər. Bu barədə vətəndaşın elektron poçt ünvanına bildiriş göndərilir və qəbula yazılış Nazirliyin müvafiq qurumu tərəfindən qeydiyyata alınır.

- Qeyri-kommersiya hüquqi şəxslərin və təhsil müəssisələrinin qeydiyyatı proseduru, adları, eləcə də qeydiyyata alınıb-alınmaması barədə məlumatın verilməsi

Bu elektron xidmətdən yararlanaraq qeyri-kommersiya qurumlarının və təhsil müəssisələrinin,  xarici hüquqi şəxslərinin nümayəndəlik və ya filiallarının dövlət qeydiyyatına alınması, reyestrdən çıxarılması, təsis sənədlərində edilmiş dəyişikliklərin və qeydə alınmış faktların sonrakı dəyişikliyinin qeydiyyata alınması üçün zəruri olan sənədlər, müraciət  etmək hüququ olan şəxslərin siyahısı və dövlət rüsumu barədə, eləcə də həmin qurumların qeydiyyata alınıb-alınmamasına dair məlumat almaq mümkündür. İstifadəçilər sistemə daxil olaraq onları maraqlandıran hüquqi şəxsin adını daxil etməklə həmin və ya oxşar adlı qeyri-kommersiya qurumlarının, xarici qeyri-kommersiya hüquqi şəxslərinin nümayəndəlik və ya filiallarının və təhsil müəssisələrinin qeydiyyata alınıb alınmaması barədə məlumat almaq imkanı əldə edirlər.

- Qeyri-kommersiya hüquqi şəxslərin və təhsil müəssisələrinin ləğv edilməsi, kreditorların tələblərinin bildirilməsi qaydası və müddəti haqqında məlumatın dərc olunması ilə bağlı müraciətlərin qəbulu və dərc olunması barədə sənədin verilməsi

Bu xidmət qeyri-kommersiya qurumunun və ya təhsil müəssisəsinin ləğv edilməsi, kreditorların tələblərinin bildirilməsi qaydası və müddəti barədə məlumatın "Ədliyyə" qəzetində dərc olunması ilə bağlı müraciətin elektron formada qəbulu və dərc olunma faktını təsdiq edən sənədin verilməsi məqsədilə yaradılmışdır. Bunun üçün istifadəçi elektron xidmətə daxil olaraq ləğv anketini doldurmalıdır. Ləğv barədə müraciət daxil olduğu gün qeydiyyata alınır və qəbul olunması ilə bağlı istifadəçinin elektron poçt ünvanına dərhal bildiriş göndərilir. Xidmətin icra müddəti "Ədliyyə" qəzetinin dərc edildiyi gündən 3 gün təşkil edir.

- "Fərdi elektron pəncərə" elektron məlumat sistemindən istifadə qaydaları

"Fərdi elektron pəncərə" elektron məlumat sistemindən istifadə etməklə qeyri-hökümət təşkilatlarının fəaliyyəti ilə bağlı dövlət orqanlarında mövcud olan məlumatlarla tanış olmaq, çıxarışları çap etmək, üzvləri, həmçinin könüllü fəaliyyətə cəlb olunmuş şəxslər barədə informasiyanı əlavə etmək, elektron xidmətlərdən vahid mənbədən istifadə etmək, qrantların ayrılması və verilməsi ilə bağlı məlumatları vahid bazada toplamaq, elekton poçt ünvanına daxil olmadan sistemin iştirakçıları olan dövlət orqanları və qeyri-hökümət təşkilatları ilə sənəd dövriyyəsini həyata keçirmək, fəaliyyəti ilə bağlı arayış, elan və digər məlumatları sistemə yerləşdirmək, normativ hüquqi bazadan istifadə etmək  mümkündür.

- Mətbu nəşrlərin uçotu üçün müraciətin və sənədlərin qəbulu

Mətbu nəşrləri uçota almaq arzusunda olan şəxslər bu xidmətin köməyi ilə müraciət formasına müvafiq məlumatları əlavə edərək Ədliyyə Nazirliyinə elektron qaydada göndərmək imkanı əldə edirlər. Müraciətin qəbul olunması ilə bağlı istifadəçinin elektron poçt ünvanına dərhal bildiriş göndərilir. Mətbu nəşrin uçotu aparılır və müraciətin bir nüsxəsi (üzərində müvafiq ştamp və reyestrə daxil edilmə nömrəsi göstərilməklə) elektron imza ilə təsdiq olunaraq elektron poçt vasitəsilə istifadəçiyə göndərilir və ya fərdi qaydada təqdim olunur.

- İcra qurumları və onlar tərəfindən hərraca çıxarılan əmlaklar, eləcə də dəyəri 500 manatdan artıq olmayan daşınar əmlakın satışı üzrə ticarət şəbəkələri haqqında məlumatın verilməsi

Bu xidmətdə ölkə ərazisində fəaliyyət göstərən icra qurumları, eləcə də hərraca çıxarılmış əmlaklar, hərracın keçiriləcəyi yer və şərtlər barədə məlumat əldə etmək mümkündür. Həmçinin burada dəyəri 500 manatdan artıq olmayan daşınar əmlakların satışı üzrə ticarət şəbəkələrinin adları və onların əlaqə məlumatları yerləşdirilmişdir.

Borcun, icra ödənişinin, icra hərəkətləri ilə bağlı xərclərin internet vasitəsilə ödənilməsi

Banka və ya icra qurumlarına getmədən icra ödənişləri və hərəkətləri ilə bağlı xərclərin internet vasitəsilə ödənilməsi üçün bu xidmətdən istifadə etmək mümkündür. Ödəniş həyata keçirildikdən sonra bu barədə sənədin çap edilməsi imkanı da mövcuddur.

- Borclunun ölkədən getmək hüququnun müvəqqəti məhdudlaşdırılması barədə məlumatın verilməsi

Ölkədən kənara çıxmaq istəyən hər bir şəxs bu xidmətdən istifadə edərək müvafiq xanalara şəxsiyyət vəsiqəsinin seriya və nömrəsini daxil etməklə onun ölkədən getmək hüququna məhdudiyyət qoyulması barədə məlumatı almaq imkanı əldə edir.

- Sahibkarlıq sahəsində aparılan yoxlamaların vahid məlumat reyestrindən məlumatın əldə edilməsi

Hər bir sahibkarlıq subyektinə yoxlayıcı orqanlar tərəfindən onun barəsində təyin olunmuş yoxlamalara və keçirilmiş yoxlamaların nəticələrinə dair məlumat əldə etməsi üçün bu xidmətdən yararlanmaq imkanı yaradılmışdır. Sahibkarlıq sahəsində aparılan yoxlamaların vahid məlumat reyestrindən bu xidmət vasitəsilə məlumat almaq məqsədilə qeydiyyatdan keçərək daimi istifadəçi kodu əldə etmək  və ya qeydiyyatsız müraciət etmək mümkündür.

- Azərbaycan Respublikasının vətəndaşlarına, həmçinin Azərbaycan Respublikasında daimi yaşayan əcnəbilər və vətəndaşlığı olmayan şəxslərə fərdi identifikasiya nömrəsi barədə məlumatın verilməsi

Bu xidmətdən istifadə etməklə istifadəçiyə sistemə şəxsiyyət vəsiqəsinin seriya və nömrəsini, şəxsiyyət vəsiqəsi olmadıqda isə adı, soyadı, ata adı və doğum tarixi barədə məlumatları daxil edərək fərdi identifikasiya nömrəsini öyrənmək imkanı yaradılmışdır.

- Ədliyyə Nazirliyinə elektron müraciət

Hər bir fiziki və hüquqi şəxs bu elektron xidmətdən istifadə etməklə ərizə, şikayət və təkliflərini Ədliyyə Nazirliyinə göndərmək imkanı əldə edir. İstifadəçi müvafiq sahələrə elektron poçt ünvanını, müraciətin məzmununu daxil edir, müraciətin formasını seçərək sorğunu göndərir. Müraciətin nəticəsi barədə istifadəçinin elektron poçt ünvanına müvafiq cavab məktubu göndərilir.

- Mülki dövriyyə nəticəsində baş verən hüquqi hadisələrdən yaranan yeni hüquq və vəzifələr barədə fiziki və hüquqi şəxslərin məlumatlandırılması

Şəxs bu xidmətə şəxsiyyət vəsiqəsinin seriya və nömrəsini, eləcə də mobil telefon nömrəsini daxil edərək abunə olmaqla borclunun ölkədən getmək hüququnun məhdudlaşdırılması və Qüvvədən düşmüş sənədlərin dövlət reyestrindən sms vasitəsilə məlumat almaq imkanı əldə edir.

Keçidlər