X
Azərbaycanın tutduğu yol müstəqil Azərbaycan Respublikası, demokratik hüquqi cəmiyyət qurmaq yoludur! Heydər Əliyev
Ölkəmizin hərtərəfli inkişafı üçün, demokratik, hüquqi dövlətin əsaslarının möhkəmlənməsi üçün məhkəmə-hüquq sisteminin təkmilləşməsi başlıca şərtdir İlham Əliyev
Bölmələr

Ədliyyə Nazirliyində dövlət təltifləri təqdim olunub

Noyabrın 30-da Ədliyyə Nazirliyində Azərbaycan ədliyyəsinin 100 illik yubileyi münasibətilə dövlət təltiflərinə layiq bilinmiş ədliyyə işçilərinə təltiflərin təqdim olunması mərasimi keçirilib.

Mərasim peşə bayramını ədliyyə işçilərinə bəxş etmiş ümummilli lider Heydər Əliyevin nazirlikdəki büstü önünə gül dəstələrinin qoyulması ilə başlayıb.

Tədbirdə çıxış edən ədliyyə naziri Fikrət Məmmədov ulu öndər Heydər Əliyevin müəyyən etdiyi dövlət inkişafı kursunun ölkə Prezidenti cənab İlham Əliyevin rəhbərliyi ilə uğurla həyata keçirilməsini, ölkəmizin davamlı sosial-iqtisadi tərəqqisini, demokratik hüquqi dövlət quruculuğunda nailiyyətləri vurğulayıb, Azərbaycan ədliyyəsinin 100 illik yubileyi münasibətilə keçirilən tədbirlərdən danışıb.

Bildirilib ki, bu münasibətlə "Azərbaycan ədliyyəsinin 100 illiyi (1918-2018)” yubiley medalı təsis edilib, bayram ərəfəsində ədliyyənin tarixi və müasir fəaliyyətindən bəhs edən "Azərbaycan ədliyyəsi davamlı inkişaf yolunda" adlı xüsusi kitab, müxtəlif dillərdə digər nəşrlər və maarifləndirici vəsaitlər hazırlanıb, nazirliyin bütün struktur qurumlarında silsilə tədbirlər keçirilib. Bakıda bir sıra xarici dövlətlərin ədliyyə nazirlərinin, beynəlxalq təşkilatların və ölkəmizin aidiyyəti dövlət orqanlarının rəhbərlərinin iştirakı ilə yubileyə həsr olunmuş "Azərbaycan ədliyyəsinin bir əsrlik inkişaf yolu" mövzusunda beynəlxalq konfrans və qəbul təşkil olunub.

Möhtərəm Prezidentimiz cənab İlham Əliyevin yubiley münasibətilə ədliyyə işçilərinə və hakimlərə təbrik müraciəti, məhkəmə və ədliyyə orqanlarında uzunmüddətli səmərəli fəaliyyətinə və cəza-icra siyasətinin həyata keçirilməsində fəal iştiraklarına görə böyük bir qrup ədliyyə işçisi və hakimləri orden və medallara, fəxri adlara, ali xüsusi rütbələrə layiq bilməsi peşə bayramını və yubileyi xüsusilə əlamətdar edib, yüksək ehtiram və minnətdarlıq hissləri doğurmaqla, hər bir ədliyyə işçisini daha əzmlə çalışmağa səfərbər edib.

Tədbirdə ölkə Prezidentinin sərəncamları ilə orden və medallar, fəxri adlarla təltif olunmuş ədliyyə işçilərinə nazir F.Məmmədov tərəfindən həmin təltiflər təntənəli təqdim olunub. Həmçinin Azərbaycan Respublikasının Prezidenti adından "Azərbaycan ədliyyəsinin 100 illiyi (1918-2018)" yubiley medalına, habelə digər təltiflərə layiq görülən əməkdaşlara həmin mükafatlar təqdim edilib.

Təltif olunanlar əməklərinə verilən yüksək qiymətə və qayğıya görə dövlət başçısına minnətdarlıqlarını ifadə edib, onlara göstərilən bu böyük etimadı bundan sonra da doğruldacaqlarını, sədaqət və əzmlə çalışaraq demokratik hüquqi dövlət quruculuğu prosesində əllərindən gələni əsirgəməyəcəklərini söyləyiblər.

Keçidlər