Doğum qeydiyyatı
0
06-07-2020 | 17:42 1980
2020-ci il iyulun 22-də Azərbaycan milli mətbuatının 145 illiyi tamam olur. Bu münasibətlə ölkə Prezidenti cənab İlham Əliyev tərəfindən 30.06.2020-ci il tarixdə imzalanmış Sərəncamla xüsusi karantin rejiminə riayət etməklə yubiley tədbirlərinin keçirilməsi tapşırılmışdır.
Yubileyə həsr olunan tədbirlər çərçivəsində 22 iyul – Milli Mətbuat Günü ərəfəsində Ədliyyə Nazirliyi tərəfindən Azərbaycan Mətbuat Şurası ilə birgə elan olunmuş jurnalist araşdırmaları müsabiqəsinin nəticələri üzrə qaliblərin mükafatlandırılması nəzərdə tutulur.
Xatırladılır kı, “Məhkəmə-hüquq sistemində islahatların dərinləşdirilməsi haqqında” ölkə Prezidentinin 3 aprel tarixli Fərmanın icrası üzrə görülən işlərin, əldə olunan nailiyyətlərin və tətbiq olunan yeniliklərin kütləvi informasiya vasitələrində dolğun, obyektiv və geniş işıqlandırılması, təbliği məqsədilə elan olunmuş "Məhkəmə-hüquq islahatları: müasir çağırışlar və innovativ təcrübələr" mövzusunda müsabiqəyə cari ilin mart ayının 1-dən başlanılmışdır.
Lakin COVİD-19 qlobal pandemiyası ilə bağlı ölkəmizdə xüsusi karantin rejiminin tətbiq edilməsi nəzərə alınaraq müsabiqənin vaxtı uzadılmışdır.
İyul ayının 15-dək davam edəcək müsabiqəyə qoşulmaq arzusunda olanlar ətraflı məlumatı nazirliyin saytından (http://justice.gov.az/news/1695) əldə edə bilərlər. İştirakçılar yazı və digər materialları həmçinin, Ədliyyə Nazirliyinə elektron qaydada (mojpress@justice.gov.az) müsabiqənin şərtlərinə uyğun olmaqla göndərə bilərlər.
