FİKRƏT FƏRRUX OĞLU MƏMMƏDOV

Fikrət Fərrux oğlu Məmmədov 1955-ci ildə Bakı şəhərində anadan olmuşdur.

O, 1977-ci ildə M.V.Lomonosov adına Moskva Dövlət Universitetinin hüquq fakültəsini, 1988-ci ildə Bakı Ali Partiya Məktəbini bitirmişdir. Əmək fəaliyyətinə 1977-ci ildə rayon prokurorunun köməkçisi kimi başlamış, Bakı şəhər prokurorluğunda şöbə prokuroru, respublika prokurorluğunda böyük prokuror və Təşkilat-nəzarət şöbəsinin rəisi vəzifələrində işləmiş, həmin vəzifədən Azərbaycan KP MK İnzibati orqanlar şöbəsində hüquq mühafizə orqanları ilə iş üzrə təlimatçı vəzifəsinə keçirilmişdir.

Sonralar respublika Baş Prokurorluğu Hüquqi təminat idarəsinin rəisi, Sumqayıt şəhər prokuroru, 1994-2000-ci illərdə Baş prokurorun müavini olmuş, 2000-ci ilin aprel ayında Azərbaycan Respublikasının ədliyyə naziri təyin edilmişdir. 2005-ci ildən Məhkəmə-Hüquq Şurasının sədridir. I dərəcəli dövlət ədliyyə müşaviri ali xüsusi rütbəsindədir.

Ümummilli lider Heydər Əliyev sədri olmuş Hüquqi İslahat Komissiyasının işində iştirak etmişdir, Azərbaycan Respublikasının Korrupsiyaya Qarşı Mübarizə Komissiyasının və digər dövlət komissiyalarının üzvüdür.

Beynəlxalq Prokurorlar Assosiasiyasının senatoru və fəxri üzvü, Beynəlxalq Antikorrupsiya Orqanları Assosiasiyasının və BMT-nin Cinayətkarlığın qarşısının alınması və cinayət ədliyyəsi üzrə Konqresinin vitse-prezidentidir. Bir çox mötəbər beynəlxalq forumlarda Azərbaycan Respublikasını təmsil etmiş, plenar iclaslarda sədrlik etmiş və əsas məruzəçi qismində çıxış etmişdir.

Azərbaycan Respublikası ədliyyə orqanlarının inkişafında xidmətlərinə görə respublika Prezidentinin 30 iyun 2005-ci il tarixli Sərəncamı ilə "Şöhrət" ordeni, 30 iyun 2015-ci il tarixli Sərəncamı ilə "Azərbaycan Respublikası Prezidentinin fəxri diplomu", 20 noyabr 2018-ci il tarixli Sərəncamı ilə 1-ci dərəcəli “Vətənə xidmətə görə” ordeni ilə təltif edilmişdir.

Məhkəmə-hüquq islahatlarının həyata keçirilməsi üzrə səmərəli fəaliyyətinə və Məhkəmə-Hüquq Şurasının işinə əhəmiyyətli töhfəsinə görə ölkə başçısının 21 noyabr 2008-ci il tarixli Sərəncamı ilə «Azərbaycan Respublikasının əməkdar hüquqşünası» fəxri adına layiq bilinmişdir, Prokurorluğun fəxri işçisidir.

Həmçinin, dövlətimizin müxtəlif medalları ilə təltif olunmuş, beynəlxalq təşkilatların və xarici dövlətlərin medallarına və digər mükafatlarına layiq görülmüşdür.

Xarici nəşrlərdə bir sıra yazıları dərc olunmuşdur, rus və ingilis dillərində sərbəst danışır.

Evlidir, 4 övladı var.

iacca
help_az
iap
eplc