Doğum qeydiyyatı
04-09-2019 | 15:45 1200
Ölkəmizdə səfərdə olan Avropa Şurasının Vətəndaş Cəmiyyətləri ilə iş üzrə Bölməsinin rəhbəri xanım Mary-Ann Hennessey ilə 2019-cu il 4 sentyabr tarixdə Ədliyyə Nazirliyinin Qeydiyyat və notariat baş idarəsində görüş keçirilmişdir.
Görüş zamanı xanım Mary-Ann Hennessey “Azərbaycanda Vətəndaş İştirakçılığının Təşviqi” Layihəsinin ilkin variantı barədə məlumat vermişdir. Bildirilmişdir ki, əsas məqsəd yalnız Bakı şəhərində deyil, eləcə də regionlarda fəaliyyət göstərən qeyri-hökumət təşkilatlarının fəal iştirakına nail olmaqla, onların dövlət orqanları və bələdiyyələrlə qarşılıqlı faydalı əməkdaşlığının təmin olunmasından ibarətdir.
Tədbirdə eyni zamanda qərarların qəbul edilməsində həqiqi vətəndaş iştirakına nail olmaq üçün qeyri-hökumət təşkilatları və dövlət orqanları arasında davamlı və əhatəli dialoqun yaradılmasının zəruriliyi qeyd edilmişdir.
Həmçinin 2016-2018-ci illərdə Avropa Şurası və Avropa Birliyi tərəfindən həyata keçirilən "Azərbaycanda vətəndaş cəmiyyəti dialoqu" Layihəsinin Azərbaycan hakimiyyəti ilə vətəndaş cəmiyyəti nümayəndələri arasında tərəfdaşlığın qurulmasında müstəsna rolu vurğulanmışdır.
