Doğum qeydiyyatı
0
14-12-2011 | 04:02 771
Müasir dövrün tələbləri prizmasından Azərbaycanda məhkəmə-hüquq islahatlarına dair beynəlxalq konfransda iştirak etmək məqsədilə respublikamızda səfərdə olan Avropa Şurası Ədalət mühakiməsinin səmərəliliyi üzrə Komissiyasının (CEPEJ) vitse-prezidenti Georq Stava və BMT-nin Məhkəmələrin ədalətliliyi və şəffaflığı üzrə hakimlər Qrupunun koordinatoru Nihal Cayavikrama dekabrın 14-də ədliyyə naziri, Məhkəmə-Hüquq Şurasının sədri Fikrət Məmmədov ilə görüşmüşdür.
Konfransda iştiraka və maraqlı çıxışlara görə qonaqlara təşəkkürünü bildirən nazir tədbirin məhkəmə sistemi üçün mühüm əhəmiyyət kəsb etdiyini söyləmiş, Konfransın əsas mövzularından olan və hakimlərin müstəqilliyinin, obyektivliyinin təmin olunmasına, korrupsiyanın qarşısının alınmasına yönələn Hakimlərin davranışı üzrə BMT-nin Banqalor adlanan prinsiplərinin ədalət mühakiməsinin səmərəliliyinin artırılmasında mühüm rolunu qeyd etmiş, ölkə Prezidenti cənab İlham Əliyevin rəhbərliyi ilə aparılan genişmiqyaslı məhkəmə-hüquq islahatları barədə məlumat vermiş, bu sahədə beynəlxalq təşkilatlarla, o cümlədən BMT və Avropa Şurası ilə səmərəli əməkdaşlığı vurğulamışdır.
G.Stava ölkəmizə səfərdən məmnunluğunu ifadə edərək CEPEJ-lə Azərbaycan arasında əməkdaşlığın yüksək səviyyədə olduğunu bildirmişdir. Qonaq qeyd etmişdir ki, Komissiyanın dekabrın 7-8-də keçirilmiş sonuncu iclasında Azərbaycanın məhkəmə sisteminin inkişafı, müasirləşdirilməsi və yeni infrastrukturun yaradılması ilə bağlı görülən genişmiqyaslı işləri böyük marağa səbəb olaraq yüksək qiymətləndirilmişdir. Bu sahədə görülən tədbirlərə, qoyulan sərmayələrə, ən müasir informasiya-kommunikasiya texnologiyalarının və qabaqcıl təcrübələrin tətbiqinə görə Azərbaycanın öncül dövlət olduğu vurğulanmışdır. Həmçinin, hakimlərin tədrisinə və maarifləndirmə işinin aparılmasına, o cümlədən bütün Avropa dövlətləri məhkəmə sistemlərinin fəaliyyətinə dair təhlilləri əks etdirən CEPEJ-in əhatəli hesabatlarının ana dilinə tərcümə edilərək hakimlər arasında yayılmasını təmin edən ilk dövlət olduğumuz xüsusi təqdir edilmişdir.
Görüşdə məmnunluqla xəbər verilmişdir ki, respublikamızda hakimliyə namizədlərin seçimi qaydaları CEPEJ ekspertləri tərəfindən ölkəmizə səfər edilərək izlənilmiş və nəticəsi üzrə hazırlanmış hesabatda bu prosedur xüsusi şəffaflığı, obyektivliyi, saflığı ilə fərqləndirilmiş, Komissiyanın həmin iclasında bununla bağlı xüsusi qərar qəbul olunaraq Azərbaycanın bu müsbət təcrübəsi Avropa dövlətlərinə örnək kimi tövsiyə edilmişdir.
Şri-Lankanın ədliyyə naziri olmuş N.Cayavikrama Konfransın uğurla keçməsini qeyd edərək BMT-nin Banqalor prinsiplərinin hazırlanması prosesinə rəhbərlik etdiyini və Azərbaycanda bu prinsiplərin tətbiqinə böyük diqqətin şahidi olduğunu vurğulamışdır. Qonaq Azərbaycanın Banqalor prinsiplərinin və onunla bağlı bütün aidiyyəti sənədlərin tərcüməsini və hakimlər arasında yayılmasını təşkil edən yeganə ölkə olduğunu yüksək qiymətləndirmişdir.
Qonaqlar nazirlikdə Ədliyyə tarixi muzeyi ilə tanış olmuşlar.
