Doğum qeydiyyatı
0
24-09-2012 | 04:02 1749
Sentyabrın 19-21-də Avropa Şurası tərəfindən Avstriya Hökuməti ilə birgə Vyanada Avropa ədliyyə nazirlərinin 31-ci konfransı keçirilmişdir.
Konfransda Azərbaycanı ədliyyə naziri, Məhkəmə-Hüquq Şurasının sədri Fikrət Məmmədov rəhbərlik etdiyi nümayəndə heyəti ilə təmsil etmişdir.
Avropa ədliyyə nazirlərinin və nüfuzlu beynəlxalq təşkilatların rəhbər şəxslərinin iştirak etdiyi konfransda Avstriyanın ədliyyə naziri xanım Beatriks Karl və Avropa Şurası Baş katibinin müavini xanım Qabriela Battani-Draqoni giriş sözü ilə çıxış etmişlər.
Zorakılığa qarşı ədliyyənin cavabları mövzusuna həsr olunmuş tədbirdə cinayətkarlığın qarşısının alınması sahəsində qanunvericiliyin təkmilləşdirilməsi, mütəşəkkil cinayətkar qrupların yeni fəaliyyət növləri və şəhərlərdə baş verən zorakılıq ilə mübarizə, yuvenal ədliyyənin problemləri və digər aktual məsələlər müzakirə olunmuşdur.
Müzakirələr zamanı Azərbaycanın ədliyyə naziri çıxış edərək ölkə Prezidenti cənab İlham Əliyevin rəhbərliyi ilə hüquq mexanizmlərinin təkmilləşdirilməsi üzrə həyata keçirilən islahatlar, bu sahədə yeni qanunların qəbulu, insan hüquqlarının qorunması, yuvenal ədliyyənin tətbiqi, yeniyetmə məhkumların imtiyazlarının və tərbiyəvi tədbirlərin genişləndirilməsi barədə məlumat vermiş, konkret təkliflər irəli sürmüşdür. Çıxışda həmçinin, Ermənistan-Azərbaycan Dağlıq Qarabağ münaqişəsi, torpaqlarımızın 20%-nin Ermənistan tərəfindən işğalı nəticəsində bir milyon insanın, o cümlədən yüz minlərlə uşağın hüquqlarının kobud şəkildə pozulması faktı vurğulanmışdır.
Konfrans zamanı bütün Avropa dövlətlərinin məhkəmə sistemlərinin təhlili üzrə hazırlanmış hesabatın təqdimatı keçirilmişdir. Həmin hesabat Ədalət mühakiməsinin səmərəliliyi üzrə Avropa Komissiyası (CEPEJ) tərəfindən tərtib olunmuşdur. Azərbaycanın məhkəmə sisteminin müasirləşdirilməsində əldə etdiyi müsbət nəticələr və CEPEJ ilə səmərəli əməkdaşlığı nəzərə alınaraq, təşkilatçıların dəvəti ilə Avropa məkanından cəmi üç dövlətin - Konfransa ev sahibliyi edən Avstriya ilə yanaşı, Fransa və Azərbaycanın ədliyyə nazirləri təqdimat mərasimində iştirak etmişlər.
Tədbirin açılışında çıxış edən F.Məmmədov bu sahədə Avropa Şurasının fəaliyyətinin əhəmiyyətini, məhkəmə-hüquq islahatları üçün CEPEJ-in hesabatından üzv dövlətlərin bəhrələndiyi və Azərbaycanın uğurları haqqında məlumat vermişdir.
Hesabatda Azərbaycanda genişmiqyaslı məhkəmə islahatı, bu sahənin maliyyələşməsinin yüksəldilməsi, hakimlərin sayının artırılması, modern məhkəmə infrastrukturunun yaradılması və müasir texnologiyaların tətbiqi təqdir olunmuşdur.
Media nümayəndələri tərəfindən böyük marağa səbəb olan mərasimdən sonra nazirlərin iştirakı ilə mətbuat konfransı keçirilmiş, ədliyyə fəaliyyəti üzrə çoxsaylı suallar verilmiş, ölkəmizin ədliyyə naziri Türkiyənin KİV-lərinə ayrıca müsahibə vermişdir.
Konfrans çərçivəsində bütün nazirlərin iştirakı ilə korrupsiya ilə mübarizəyə həsr olunmuş dəyirmi masa da keçirilmişdir. Tədbirdə Avstriyada yerləşən Beynəlxalq Antikorrupsiya Akademiyasının direktoru çıxış edərək bu sosial bəla ilə bağlı aparılmış geniş təhlillərin təqdimatını keçirmiş, rəhbərlik etdiyi qurum haqqında məlumat vermiş, qarşılıqlı fikir və təcrübə mübadiləsi aparılmışdır.
Eyni zamanda qeyd olunmalıdır ki, Azərbaycanda ölkə Prezidentinin rəhbərliyi ilə korrupsiyaya qarşı sərt mübarizənin aparılması, bu sahədə beynəlxalq əməkdaşlığa və tədrisə böyük əhəmiyyətin verilməsi nəzərə alınaraq dövlətimiz Beynəlxalq Antikorrupsiya Akademiyasının nizamnaməsinə xüsusi qanunla yenicə qoşularaq onun tamhüquqlu üzvü olmuşdur. Səfər zamanı nümayəndə heyəti tərəfindən Akademiyaya baş çəkilərək onun fəaliyyəti ilə tanış olunmuş, qurumun rəsmiləri ilə görüş keçirilmiş, konkret əməkdaşlıq məsələləri müzakirə olunmuşdur.
Forumun yekununda müzakirə olunan məsələlərə dair qətnamə qəbul olunmuşdur.
Bu mötəbər Konfransın tribunasından öz çirkin niyyətləri üçün istifadə etmək istəyən Ermənistan tərəfi Ramil Səfərovun Azərbaycana verilməsi və əfvi ilə bağlı etirazını təkidlə gündəliyə salmağa, bu mövzu üzrə xüsusi çıxış etməyə və müzakirələrin aparılmasına cəhd göstərmişdir. Lakin tədbirin mövzusuna heç bir aidiyyəti olmayan bu yersiz cəhdin qarşısı Azərbaycan nümayəndə heyətinin qəti və əsaslandırılmış etirazları nəticəsində alınmışdır. Öz məkrli cəhdinin puça uğradığını görən Ermənistan tərəfi iştirakçılar arasında R.Səfərovun əfv edilməsinin guya Avropa hüquq və dəyərlərinə zidd olması barədə bəyanat paylamışdır. Lakin dərhal Azərbaycan nümayəndə heyəti tərəfindən məsələni hüquqi çərçivədə həqiqətə uyğun açıqlayan bəyanat yayılmışdır. Sənəddə məsələnin beynəlxalq konvensiya və ikitərəfli öhdəliklərə tam uyğun həll olunduğu qeyd olunmuşdur. Qəti tədbirlər nəticəsində ermənilər öz absurd məqsədlərinə nail olmamış, əksinə konfrans iştirakçılarının diqqəti erməni terrorizminə, xüsusilə də ASALA erməni terror təşkilatının azərbaycanlılara qarşı terror hədələrinə cəlb edilmişdir.
Səfər çərçivəsində bir sıra dövlətlərin ədliyyə nazirləri, habelə Avropa Şurasının yüksək səviyyəli nümayəndələri ilə əməkdaşlığa dair danışıqlar aparılmışdır.
