Doğum qeydiyyatı
01-02-2013 | 04:02 900
Ölkə Prezidenti cənab İlham Əliyev yanvarın 15-də Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunmuş iclasında korrupsiyaya qarşı mübarizə tədbirlərinin amansız aparılması, bu sahədə nəzarət və hesabat sisteminin səmərəsinin artırılması, eləcə də elektron xidmətlərin tətbiqi dairəsinin genişləndirilməsi, ictimai nəzarətin gücləndirilməsi və şəffaflığın təmin edilməsi barədə bütün dövlət qurumlarına qəti tapşırıqlar vermişdir.
Bununla əlaqədar, fevralın 1-də ədliyyə naziri Fikrət Məmmədovun sədrliyi ilə nazirliyin kollegiya iclası keçirilmişdir. İclasda qeyd olunmuşdur ki, dövlət başçısının tapşırıqlarına əsasən ölkədə korrupsiyaya qarşı mübarizə sahəsində mükəmməl qanunvericilik və institusional islahatlar aparılmış, Korrupsiyaya qarşı mübarizəyə və Açıq Hökumətin təşviqinə dair Milli Fəaliyyət planları təsdiq olunmuş, müasir informasiya-kommunikasiya texnologiyaları tətbiq olunmaqla dövlət orqanlarının fəaliyyətində şəffaflığın artırılması, habelə vətəndaşların rahatlığının təmin olunması məqsədilə yeni şəffaf və innovativ xidmətlər, o cümlədən "ASAN xidmət" mərkəzləri yaradılmışdır.
Bildirilmişdir ki, korrupsiya ilə mübarizə tədbirləri daim diqqətdə saxlanılaraq ədliyyə orqanlarında və məhkəmələrdə korrupsiyaya şərait yaradan halların qarşısının qətiyyətlə alınması, ədliyyə və məhkəmə işçilərində antikorrupsiya mədəniyyətinin yüksəldilməsi, bu sahədə beynəlxalq əməkdaşlığın təşviqi üzrə məqsədyönlü addımlar atılmış, əhalinin ədliyyə orqanlarına və məhkəmələrə çatımlılığının asanlaşdırılması üçün müasir elektron xidmətlər yaradılmışdır. Belə ki, ədliyyə orqanlarında vətəndaşlara ədliyyə fəaliyyəti barədə zəruri məlumatları əldə etməyə, rüsumları birbaşa ödəməyə imkan yaradan elektron köşklərin, habelə nəzarətin gücləndirilməsi məqsədi ilə veb-kameraların tətbiqinə başlanılmışdır. Artıq belə köşklər ölkə üzrə fəaliyyət göstərən bütün notariat kontorlarının 1/3-ni əhatə etmiş, veb-kameralar isə 10-dək notariat kontorlarında quraşdırılmışdır və bu proses hazırda davam etdirilir.
İşə qəbul prosedurları da xeyli sadələşdirilmiş, namizədlər yalnız ərizə verməklə test imtahanında iştirak etməyə buraxılır. Həmçinin, imtahan prosesi internetdə canlı yayımlanır.
Eyni zamanda, bütün məhkəmələr və hakimlər haqqında məlumatları, habelə məhkəmə sənədlərinin nümunələrini əks etdirən məhkəmə sisteminin vahid internet portalı fəaliyyət göstərir.
Nazirlikdə vətəndaşların şikayətlərinə operativ baxılması və təxirəsalınmaz tədbirlərin görülməsi məqsədilə yaradılmış "Qaynar xətt"lərin fəaliyyəti genişləndirilərək təkmilləşdirilmişdir.
Kollegiyada nazirlik tərəfindən 2012-ci ildə ədliyyə orqanlarında aparılmış xidməti yoxlama və araşdırmaların nəticələrinə görə 447 əməkdaşın intizam məsuliyyətinə cəlb olunduğu, korrupsiya hallarına yol verilməsi faktı ilə bağlı təkcə son iki il ərzində prokurorluğa 13 nəfər barəsində materialların göndərildiyi və onlardan 5 nəfərinin məhkum olunduğu qeyd edilmişdir. Eyni zamanda, məhkəmə qərarlarının icrası vəziyyəti ötən ilin sonunda geniş müzakirə olunaraq bu sahədə süründürməçiliyin, korrupsiyaya şərait yaradan digər halların aradan qaldırılmasına dair ən qəti tədbirlərin müəyyən olunduğu və kobud qanun pozuntularına yol vermiş 30-dək əməkdaşın ciddi intizam məsuliyyətinə cəlb edildiyi diqqətə çatdırılmışdır.
Həmçinin qeyd olunmuşdur ki, Məhkəmə-Hüquq Şurasının qərarları əsasında son iki il ərzində korrupsiyaya şərait yaradan hüquqpozmalara yol verdiklərinə görə 8 hakim, ümumilikdə isə 22 hakim intizam məsuliyyətinə cəlb edilmişdir.
İclasda bildirilmişdir ki, korrupsiyaya qarşı mübarizə üzrə ədliyyə orqanlarında həyata keçirilən tədbirlərə baxmayaraq aparılmış təhlillər, keçirilmiş yoxlamalar, daxil olan şikayətlər və siqnallar narahatlıq doğurur. Qeyd olunmuşdur ki, yanvarın 26-da Korrupsiyaya qarşı mübarizə üzrə Komissiyanın təhsil məsələlərinə həsr olunmuş iclasında verilmiş tapşırıqlar digər qurumlara da, o cümlədən ədliyyə orqanlarına aiddir.
Bununla əlaqədar Kollegiyada qarşıda duran vəzifələr müzakirə edilmiş, ədliyyə orqanlarında və məhkəmələrdə korrupsiyaya qarşı dözümsüzlük mühitinin yaradılması, süründürməçiliyin, vəzifədən sui-istifadə və korrupsiyaya şərait yaradan digər halların qətiyyətlə qarşısının alınması, şəffaflığın daha da artırılması üzrə konkret tədbirlər müəyyən olunmuşdur. Həmçinin, müasir texnoloji yeniliklər nəzərə alınmaqla iş üsul və vasitələrinin, korrupsiya halları ilə bağlı şikayətlərə baxılması işinin, "Qaynar xətt"lərin fəaliyyətinin, qulluğa qəbulun müsabiqə və şəffaflıq əsasında həyata keçirilməsi mexanizmlərinin təkmilləşdirilməsinə dair göstərişlər verilmişdir.
Həmçinin, iclasda Məhkəmə-Hüquq Şurası ilə birgə hakimlərin etik davranış qaydalarına riayət olunması vəziyyəti öyrənilməklə bu sahədə qəti tədbirlərin görülməsinin zəruriliyi vurğulanmış, dövlət başçısı tərəfindən 2013-cü ilin "İKT ili" elan olunmasını nəzərə alaraq, ədliyyə sahəsində elektron xidmətlərin daha geniş tətbiqi, habelə xidməti yoxlamaların səmərəliliyinin yüksəldilməsi, hüquqi maarifləndirmə və antikorrupsiya tədrisi üzrə tədbirlərin canlandırılması aidiyyəti qurumlardan tələb olunmuşdur.
