Doğum qeydiyyatı
0
31-08-2023 | 15:24 435
Ədliyyə Nazirliyi tərəfindən bələdiyyələrin hüquqi maarifləndirilməsi və onlara fəaliyyətlərinin qanunauyğun qurulmasına metodoloji köməklik göstərilməsi üzrə tədbirlər davam etdirilir.
Avqustun 31-də nazirliyin Bələdiyyələrlə İş Mərkəzində Bakı şəhərində fəaliyyət göstərən bələdiyyələrin sədrlərinin iştirakı ilə seminar-müşavirə keçirilib.
Çıxış edən Mərkəzin rəisi Rəhman Məmmədov ölkə Prezidenti İlham Əliyevin Sərəncamı ilə elan olunmuş 2023-cü il “Heydər Əliyev İli”ndə Ulu Öndərin 100 illiyinin ölkəmizdə geniş qeyd olunduğunu, bu münasibətlə Nazirliyin rəhbərliyinin, deputatların, bələdiyyələrin, vətəndaş cəmiyyəti və media nümayəndələrinin iştirakı ilə “Heydər Əliyev Azərbaycanda yerli özünüidarəetmənin banisidir” mövzusunda konfrans keçirildiyini bildirib. Həmçinin Azərbaycan Bələdiyyələrinin Milli Assosiasiyaları ilə birgə bələdiyyə üzv və qulluqçularının iştirakı ilə silsilə, o cümlədən geniş ağacəkmə aksiyalarının, intellektual yarış, müsabiqə və digər maarifləndirici tədbirlərin təşkil olunduğu, Heydər Əliyev Mərkəzinə ziyarətlərin edildiyi, xüsusi qayğıya ehtiyacı olan uşaqlara baş çəkildiyi vurğulanıb. Ümumilikdə bələdiyyələr tərəfindən cari ilin birinci yarısında 450-ə yaxın tədbir keçirilib, Ulu Öndərin əziz xatirəsinə həsr olunan tədbirlər bu gün də davam etdirilir.
Müşavirədə “Bələdiyyələrlə iş portalı”nın təkmilləşdirilərək istifadəyə verilməsi qeyd olunaraq bələdiyyələrin portaldan yararlanması vəziyyəti müzakirə edilib. Bələdiyyə nümayəndələri nazirlik tərəfindən onların fəaliyyətinin səmərəli təşkili ilə bağlı yaradılan müasir iş üsullarını təqdir ediblər.
Həmçinin bələdiyyə fəaliyyəti, o cümlədən bələdiyyə torpaqlarının idarə edilməsi, onların ayrılmasına dair sənədlərin hazırlanması və razılaşdırılması ilə bağlı qanunvericiliyə edilən yeni mütərəqqi dəyişikliklərin mahiyyəti, ölkə Prezidentinin qeyri-yaşayış təyinatlı bəzi tikinti obyektlərinin istismarına icazə verilməsi ilə bağlı əlavə tədbirlərə dair Fərmanının əhəmiyyəti barədə ətraflı məlumat verilib.
Dövlət başçısının Fərmanına əsasən bələdiyyə mülkiyyətində olan torpaq sahəsində yerləşən istismara hazırlığı barədə müsbət rəy verilmiş qeyri-yaşayış binası onun yerləşdiyi torpaq sahəsi qanunauyğun qaydada müvafiq bələdiyyə tərəfindən onun sahibinin mülahizəsi əsasında mülkiyyətinə satıldıqdan və ya icarəsinə verildikdən sonra istismara qəbul edilməsi, bu zaman bələdiyyələrin Dövlət Şəhərsalma və Arxitektura Komitəsinin və ya yerli icra hakimiyyətinin qeyri-yaşayış binasının yerləşdiyi torpaq sahəsi üzərində mülkiyyət və ya icarə hüquqlarını təsdiq edən sənədin təqdim ediləcəyi təqdirdə istismarına icazə veriləcəyi barədə sifarişçiyə göndərdiyi və müvafiq bələdiyyəyə elektron qaydada ötürdüyü bildirişi və İqtisadiyyat Nazirliyi yanında Əmlak Məsələləri Dövlət Xidməti tərəfindən həmin tikinti və onu yerləşdiyi torpaq sahəsi ilə bağlı planı, tikinti sahibinin bələdiyyəyə ərizəsini əsas götürməli olması, torpaq sahələrinin hərrac və ya müsabiqəsiz birbaşa bələdiyyə qərarı ilə ayırması ətraflı izah olunub.
Xüsusi vurğulanıb ki, torpaq sahələri satılarkən və ya icarəyə verilərkən qiymətlər bazar məzənnəsinə uyğun müəyyənləşdirilməli, bu məqsədilə Əmlak Məsələləri Dövlət Xidmətinə müraciət olunaraq müvafiq arayışlar alınmalıdır.
İclasda həmçinin, 2023-cü ilin birinci yarımili ərzində Bakı bələdiyyələrinin büdcə gəlirləri, o cümlədən yerli vergi və ödənişlərdən daxil olmaların vəziyyəti müzakirə edilib.
Qeyd olunub ki, Bakı bələdiyyələri üzrə son iki ildə ümumi büdcə gəlirləri 5,3 milyon manat (58%) artaraq 2022-ci ilin yekunları üzrə 14 milyon manatdan çox, o cümlədən yerli vergilərdən daxil olmalar 4,5 milyon manat (73%) artaraq 11 milyon manata yaxın təşkil edib.
Dövlət Statistika Komitəsinin 2023-cü ilin I yarımili üzrə bələdiyyə büdcəsinin icrasına dair bülletenin göstəricilərinə görə, Bakı bələdiyyələrinin ümumi büdcə gəlirləri 15% artaraq 8,2 milyon manat, vergilərdən daxil olmalar isə 18% artaraq 5,7 milyon manat təşkil edib.
Bələdiyyələrin fəaliyyətinin daha səmərəli təşkili məqsədilə yerli büdcə gəlirlərinin artırılması, həmçinin dövlət və bələdiyyə mülkiyyətində olan torpaqların icarəçiləri olan fiziki şəxslərin də vergi uçotuna götürülməsi, yerli vergilərin toplanması, büdcə vəsaitlərindən məqsədyönlü şəkildə istifadə olunması, bir sıra aktual məsələlərin təşkili sahəsində yol verilən nöqsanların aradan qaldırılması və qanunvericiliyin tələblərinə əməl olunması ilə bağlı, o cümlədən son aylarda göndərilmiş "Pul tələbinə dair icraya yönəldilmiş inzibati aktların icrası zamanı tələbkar kimi bələdiyyələrin qanunla müəyyənləşdirilmiş hüquq və vəzifələrinə dair", "Yerli vergi ödəyicilərinin uçota götürülməsində qanunvericiliyin tələblərinə əməl olunması barədə", "Dövlət və bələdiyyə mülkiyyətində olan torpaqların icarəçiləri (istifadəçiləri) olan fiziki şəxslərin bələdiyyələrdə torpaq vergisi ödəyicisi kimi uçota alınması və vergilərin tutulmasının təmin edilməsi barədə” və digər tövsiyələrin diqqətdə saxlanılmasının zəruriliyi nəzərə çatdırılıb.
Sonda iştirakçıları maraqlandıran suallar cavablandırılıb.
Tədbirdə Azərbaycan Bələdiyyələrinin Milli Assosiasiyalarının icraçı katibi, “Bələdiyyələrin Onlayn Xidmət Mərkəzi”nin direktoru və “Bələdiyyələrin fəaliyyətinin təbliği” İctimai Birliyinin sədri iştirak ediblər.
