Doğum qeydiyyatı
0
06-05-2013 | 04:02 779
Milli dövlətçiliyimizin memarı, ümummilli lider Heydər Əliyevin 90 illik yubileyi respublikamızda və onun hüdudlarından kənarda böyük ehtiram hissi ilə geniş qeyd olunur.
Yubiley münasibətilə keçirilən silsilə tədbirlər çərçivəsində Ədliyyə Nazirliyində mayın 6-da Azərbaycan Respublikasının Milli Elmlər Akademiyası (AMEA) ilə birgə Heydər Əliyev irsini əks etdirən ədəbiyyat sərgisi açılmışdır.
Nazirliyin rəhbərliyinin iştirak etdiyi yığıncağı giriş sözü ilə açan AMEA-nın Mərkəzi Elmi Kitabxanasının direktoru, filologiya elmləri doktoru Aybəniz Əliyeva-Kəngərli bildirmişdir ki, elmi fəaliyyətlərinin əsas istiqamətlərindən biri Heydər Əliyev irsinin tədqiqi və təbliğidir. Bu məqsədlə atılan addımlar Heydər Əliyevin yüksək ideyalarının, Azərbaycanın tərəqqisində onun xidmətlərinin öyrənilməsinə, eləcə də gənc nəslin formalaşmasına xidmət edir.
Qeyd olunmuşdur ki, təqdim olunan sərgidə ulu öndər Heydər Əliyevin həyat və fəaliyyətini, zəngin idarəçilik təcrübəsini, onun respublikanın sosial-iqtisadi inkişafı və beynəlxalq aləmdə nüfuzunun artırılması istiqamətində apardığı ardıcıl, məqsədyönlü siyasəti, elm, təhsil, mədəniyyət sahəsindəki xidmətlərini əks etdirən 1000-dən çox kitab nümayiş etdirilir.
Həmçinin vurğulanmışdır ki, bu kimi tədbirin təşkili respublikanın müxtəlif regionlarında, dövlət müəssisələrində, elm və təhsil ocaqlarında davam etdiriləcəkdir.
Ədliyyə naziri Fikrət Məmmədov Azərbaycan xalqına və dövlətçiliyinə daim sədaqətlə xidmət etmiş dahi şəxsiyyət Heydər Əliyevin ömrünün və titanik fəaliyyətinin indiki və gələcək nəsillərə örnək olduğunu bildirmiş, ulu öndərin siyasi uzaqgörənliyi, müdrikliyi, müasir hüquq sistemimizin inkişafındakı müstəsna rolundan və onun rəhbərliyi ilə aparılan hüquqi islahatlardan bəhs etmiş, açılan sərgini əbədiyaşar liderimizin çoxşaxəli fəaliyyətinin təbliği və öyrənilməsi baxımından böyük əhəmiyyətini qeyd etmişdir.
Çoxsaylı ədliyyə işçiləri ulu öndərin hər kəsə nümunə ola biləcək həyat və fəaliyyəti barədə geniş təəssürat yaradan sərgi ilə böyük maraqla tanış olmuşlar.
