Doğum qeydiyyatı
09-07-2013 | 04:02 821
Ölkəmizdə aparılan hərtərəfli ədliyyə islahatları çərçivəsində penitensiar sistemin müasirləşdirilməsi, məhkumların hüquqlarının qorunması üzrə ardıcıl tədbirlər görülür, bu sahədə ictimai nəzarətin həyata keçirilməsi məqsədilə 2006-cı ildən Azərbaycan Respublikası ədliyyə nazirinin yanında İctimai Komitə fəaliyyət göstərir.
Komitə tərəfindən penitensiar müəssisələrə müntəzəm olaraq 300-dən çox başçəkmə həyata keçirilmiş, 400-dən artıq məhkuma müxtəlif məsələlərlə bağlı hüquqi yardım göstərilmiş, nəticələri üzrə tövsiyə və hesabatlar təqdim olunmuş, bununla bağlı zəruri tədbirlər görülmüşdür.
Nüfuzlu ictimaiyyət nümayəndələrinin təmsil olunduğu Seçki Komissiyası tərəfindən formalaşdırılmış İctimai Komitənin iyunun 8-də yeni tərkibdə ilk iclası keçirilmişdir. İclasda qurumun son bir illik fəaliyyəti dövründə görülmüş işlər müzakirə olunmuş, hüquq-müdafiəçisi Çingiz Qənizadə növbəti dəfə qurumun koordinatoru seçilmişdir.
Tədbirə qatılan ədliyyə nazirinin müavini Toğrul Musayev ölkə Prezidenti cənab İlham Əliyevin tapşırıqlarına əsasən penitensiar sistemdə gedən köklü dəyişikliklərdən, o cümlədən məhkumların hüquqlarının daha səmərəli təmin edilməsi, saxlanma şəraitinin yaxşılaşdırılması, bu sahədə şəffaflığın artırılması üzrə tədbirlərdən danışmış, məhkumların islah edilməsində, cəzaçəkmə müəssisələrinin fəaliyyətinə ictimai nəzarətin həyata keçirilməsində, görülən işlərin cəmiyyətə obyektiv təqdim olunmasında İctimai Komitənin fəal rolunu qeyd etmişdir.
İclasda Komitə üzvləri aparılan uğurlu penitensiar islahatların, əsaslı dəyişikliklərin şahidi olduqlarını vurğulamış, məhkumların hüquqlarının qorunması və digər məsələlərlə bağlı konkret təkliflər irəli sürmüşlər. Ədliyyə Nazirliyi tərəfindən qurumun üzvlərinə hər cür şərait yaradıldığına görə minnətdarlıq bildirilərək səylərin daha da artırılacağı bəyan edilmişdir.
