Doğum qeydiyyatı
06-04-2015 | 04:02 914
Avropa Şurasının ölkəmizlə əməkdaşlığının mühüm istiqamətlərini əhatə edən Azərbaycan üçün 2014-2016-cı illər üzrə Fəaliyyət Planının implementasiyası üzrə müvafiq tədbirlər görülür, o cümlədən sənədin tərəfdaş qurumlarından olan Ədliyyə Nazirliyi tərəfindən hüquqşünasların insan hüquqları üzrə treninqi, qabaqcıl təcrübələrin öyrənilməsində imkanların artırılması ilə bağlı birgə layihələr həyata keçirilir.
Həmçinin, məhkəmə sisteminin müstəqilliyi, vətəndaş cəmiyyətinin inkişafı, korrupsiyaya qarşı mübarizə və digər istiqamətlər üzrə işlərin başlanması nəzərdə tutulur.
Bununla əlaqədar aprelin 6-da Avropa Şurasının Bakıdakı Ofisinin rəhbəri xanım Draqana Filipoviç ilə ədliyyə nazirinin müavini Toğrul Musayevin görüşü keçirilib, Fəaliyyət Planının icrası vəziyyətinə dair müzakirələr aparılıb.
Fəaliyyət Planının səmərəli və vaxtında həyata keçirilməsində hər iki tərəfin maraqlı olduğunu bildirən nazir müavini bu istiqamətdə müəyyən işlərin görüldüyünü vurğulayıb, Avropa Şurasının Bakıdakı Ofisi ilə qarşılıqlı fəaliyyət çərçivəsində birgə layihələrin Fəaliyyət Planına uyğun hazırlanaraq uğurla icra olunacağına əminliyini ifadə edib.
Qeyd olunan Planın həyata keçirilməsində Azərbaycan dövlətinin siyasi iradəsinin olduğunu bildirən D.Filipoviç təmsil etdiyi qurumun Ədliyyə Nazirliyi ilə sıx əməkdaşlığını qeyd edib. O, Plana uyğun olaraq təşviq olunan layihələrin ayrı-ayrı məqsədlərindən və icrasının təşkilindən danışıb, Avropa İttifaqı ilə Şərq Tərəfdaşlığı proqramı çərçivəsində hazırlanmış digər layihələr barədə məlumat verib.
Faydalı fikir mübadiləsi şəraitində keçən görüşdə qarşılıqlı maraq doğuran məsələlərə aydınlıq gətirilib.
Tədbirdə Azərbaycan Respublikası Prezidenti Administrasiyasının Hüquq mühafizə orqanları ilə iş şöbəsinin sektor müdiri, ölkəmizin İnsan Hüquqları üzrə Avropa Məhkəməsindəki səlahiyyətli nümayəndəsi Çingiz Əsgərov iştirak edib.
