Ədliyyə Nazirliyi probasiya nəzarətini həyata keçirir, cəmiyyətdən təcridetmə ilə əlaqədar olmayan cəzaları icra edir. "Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə" Azərbaycan Respublikası Prezidentinin 10 fevral 2017-ci il tarixli Sərəncamına əsasən Ədliyyə Nazirliyinin Probasiya xidməti yaradılıb.
Probasiya nəzarəti üzrə fəaliyyətlər aşağıdakılardır:
- Azadlıqdan məhrum etmə ilə bağlı olmayan cəzaların icrasının təşkili;
- Cərimə;
- Nəqliyyat vasitəsini idarəetmə hüququndan, müəyyən vəzifə tutma və ya müəyyən fəaliyyətlə məşğul olma hüququndan məhrum etmə;
- İctimai işlər;
- İslah işləri;
- Azadlığın məhdudlaşdırılması növündə cəzalara məhkum edilmiş şəxslər üzərində probasiya nəzarətinin həyata keçirilməsi;
- Şərti məhkum edilmiş, cəzadan şərti olaraq vaxtından əvvəl azad olunmuş və ya məhkəmə tərəfindən cəzasının çəkilməsi təxirə salınmış, alkoqolizmdən, narkomaniyadan müalicə məqsədilə barəsində tibbi xarakterli məcburi tədbirlər təyin edilmiş şəxslər üzərində qanunvericiliklə və ya məhkəmə tərəfindən qoyulmuş vəzifələrin icrasına nəzarət;
- İnzibati həbs nəzərdə tutan inzibati xəta törətmiş, narkomaniyadan müalicəyə ehtiyacı olan şəxslərin ixtisaslaşdırılmış tibb müəssisəsində məcburi müalicəsi üzrə probasiya nəzarətinin həyata keçirilməsinin təşkili;
- Üzərində probasiya nəzarəti həyata keçirilən şəxslər tərəfindən törədilmiş yeni cinayətlərin profilaktikası, sosial adaptasiyası və reabilitasiyası;
- İctimai işlər növündə inzibati tənbehin icrasının təşkili.
